Pageviews all the time

UDUSAJYA(5): IHAME: Buri butegetsi bwose bwo mu Rwanda, nyuma y'imyaka 10 buba bumaze kwigwizaho imitungo n'ubukire benebwo bagasigara bashaka kwishimisha mu njyanishabitsina/NKUSI Yozefu

Bimwe mubyo FPR yita byiza yakuriye abanyarwanda muri Uganda: Ikimansuro i Kigali
Photo: igihe.com

Urubuga rwanyu Shikama nta gihe rwahwemye kwamagana ihutazwa ry'umuco nyarwanda rikorwa n'Agatsiko akenshi kawuvangira n'imico y'ahandi kakuye hirya no hino cyane cyane muri Uganda usanga ihabanye nawo. Bimwe mubyo Shikama yagiye yamagana yivuye inyuma mu nyandiko zinyuranye ni IKIMANSURO= uburyo bwo kubyina abakobwa basa n'abambaye uko bavutse nkuko mubyimonera ku mafoto aha.  Iyi nyandiko yasotse kuri Shikama bwa mbere kuri 2/12/2015 tukaba twongeye kuyibashyiriraho kubera impamvu ikurikira: Abategetsi banyuranye bo mu Gatsiko ngo baherutse guteranira muri kimwe bita Inteko ishinga Amategeko ku Kimihurura, ngo bige ukuntu baca ikimansuro gihabanye n'umuco nyarwanda! Ese kuva muri 4/7/1994 ubu niho aka Gatsiko k'Amabandi yitwaje intwaro nkuko kiyita, kabonye ko iki kimansuro ari uburozi kazanye mu Banyarwanda? 


Ihame ryose kugirango rifatwe gutyo koko hagomba ibimenyetso bifatika bishyigikira igitekerezo runaka kugirango koko gihinduke ihame rikaba ari ingenzi mu bushakashatsi kuko bugomba kuryubakiraho bufata ibyemezo cyangwa umwanzuro runaka. Ihame turi burebere hamwe riragira riti:" Buri butegetsi bwose bwo mu Rwanda, nyuma y'imyaka 10 buba bumaze kwigwizaho imitungo n'ubukire bene bwo bagakurikizaho kwishimisha mu njyanishabitsina". Muri iyi nyandiko ndaza kwifashisha ubutegetsi bw'ingoma 2 nzi cyane, ni ukuvuga ingoma ya Kinani n'iya Kagame Pawulo.

Ukwigwizaho imitungo no kwikuza injyanishabitsina ku ngoma ya Kinani

Ubwo naganiraga n'umwe mu banyamakuru ba ORINFOR muri muri 1986 ku byerekeye ingoma ya Kinanni, yarambwiye ati: " Habyarimana yakoze neza mu myaka 10 ya mbere, iyo aza kwizibukira ubutegetsi agashaka umusimbura, yari kuba atsinze igitego. ". Muri Shikama tukaba dushimangira ko ibivugwa n'uyu munyamakuru ari byo koko. Mu myaka 10 ya mbere ya Kinani, U Rwanda rwagendeye kure amarorerwa ashingiye ku irondakoko yakorwaga n'abategetsi b'i Burundi maze Kinani akora ku buryo haba icyizere hagati y'Abahutu n'Abatutsi. Habayeho nanone kwizerana hagati y'Amajyaruguru n'Amajyepfo n'ubwo ahari abantu buri gihe hanuka uruntu runtu nkuko umugani wacu ubivuga.Imihanda yaraharuwe mu muganda, igihugu kiba nyabagendwa, amahoro n'ubumwe birasagamba.

Nyuma y'imyaka 10 habaye gusubiranamo kw'abari biyicaje ku ngoma, Koloneli Alegisi Kanyarengwe wari nimero ya kabiri mu gihugu ahungira u Rwanda muri Tanzania, abandi bategetsi bakuru barimo majoro Tewonesiti Lizinde bafungirwa muri Sipesiyali mu Ruhengeri. Nyuma abategetsi bandi basigaye abenshi bahise babona ko ishyamba atari ryeru basiganwa no kwigwizaho imitungo: Abenshi bagiye bagura amakamyo atwara imizigo Kigali-Nairobi bitaga 1924 n'andi bitaga 1621. Hakurikiyeho kubaka amazu hirya no hino mu gihugu, kohereza abana b'abategetsi kwiga kaminuza mu bihugu bikomeye nk'Ubufransa, Ububiligi, Canada, n'Ubudage. Ibi byose birangiye, hakurikiyeho ubusambanyi budasanzwe bwakorwaga n'abayobozi ku buryo wajyaga muri Kigali umukobwa yahita bati uriya ni ibiro bya kabiri by'umutegetsi kanaka. Abazi ubucakura, bahitaga kuri ibi biro bya kabiri bashakisha akazi cyangwa andi mahirwe yatangwaga na bariya bategetsi. Muri ibi biro bya kabiri twavugamo nka Koloneli Nsekalije Aloyizi wari ufite ubushyo bwabyo, hakaba harimo umwe w'umugandekazi bitaga BINTU wanyurwagaho ku bashakaga kubona buruse zo mu mahanga(kwiga muri za kaminuza zo hanze). 

Ukwigwizaho imitungo no kwikuza injyanishabitsina ku ngoma ya Kagame Pawulo

Nkuko twavuze hejuru ko Ingoma ya Habyarimana yakoze neza koko mu myaka icumi ya mbere, muri Shikama twemeza ko no mu myaka icumi ya mbere ya Kagame hatakozwemo ubwicanyi gusa n'intambara mu bihugu by'abaturanyi; hari ibyiza byayibayemo muri byo twavuga nko kuba hari abahutu bagicaracara mu byaro no mu mijyi yo mu Rwanda ari uko ingoma ya Kagame yishe ariko ikaza gukangurira abanywamaraso bayo kugabanya umuvuduko bari bakuye muri Uganda wo gukubura ( Kufagiya) u Rwanda rugasigara rutuwe n'Abatutsi gusa. Ikindi umuntu yashima n'ukuba barazanye ijambo "ubwiyunge" mu Rwanda. Nubwo iyi ngoma ntacyo yigeze ikora ngo ubu bwiyunge bubeho, kuba yaratekereje kuri ijambo ni ingenzi. 

Ikindi niboneye n'amaso yanjye ubwo nageraga i Kigali muri 2007 nyuma y'imyaka 20 nari maze muri Libya, nasanze umutekano mu mijyi usumbye uwo nari mperutse kubona muri 1991 ubwo nasuraga u Rwanda , abajura bagashaka kunyambura malete nari  mfite ku manywa y'ihangu imbere y'abajandarume, hariya hahoze gare! Nta musirikare cyangwa umupolisi nabonye mu mijyi myinshi natembereyemo, nta n'abajura nahasanze nkuko byari bimeze muri 1991 ubwo naherukaga mu Rwanda. Mu ijoro naho abantu baridegembyaga kugeza ubwo navaga mu Rwanda muri 2009, nta bwoba bwo guhohoterwa n'abajura. Ikindi nabonye ni ikinyabupfura kidasanzwe kiranga abapolisi bo ku mihanda gitandukanye kure n'Abajandarume bo ku ngoma ya Kinani bakoraga ku mihanda bakaga ruswa umuhisi n'umugenzi. Ikindi umuntu yakwishimira ku ngoma ya Kagame n'ubupfura buranga abakora mu biro bishinzwe abinjira n'abasoka; nakoze muri iyi serivise nzi akazi katoroshye kabamo.

Nyuma y'ibyo byiza umuntu yashimira Kagame Pawulo ndetse agakomeza no kumushishikariza kubikomeza no mu zindi serivise zikirangwamo irondakoko nka RDB , perezidansi ya Kagame mu Rugwiro, Minaffet , amabanki n'izindi ntarondoye; hari ibibi bikomeje kumunga ingoma ya Kagame guhera nyuma y'imyaka icumi y'ubutegetsi bwe. Icy'ibanze kikaba cyarabaye kwigarurira igice kimwe cy'u Rwanda Abatutsi bavuye Uganda bakakigira ubukonde bwabo. Muri 2007, habaye urusaku mu itangazamakuru ryigenga ryo mu Rwanda banenga iyi myifatire y'aba batutsi. Kagame yarihagurukiye ajya mu MUTARA ahabaye  ubu bukonde maze avuga ko agiye gusaranganya amasambu akarangiza iki kibazo. Uwari ufite ubukonde buto muri aba batutsi ni jenerali Kayumba Nyamwasa wari ufite hegitari 400! 

Ni ukuvuga Leta ya Vatikani kwa Papa inshuro 10!!! Kagame yaragiye agenda ahagabanya agasigira buri wese ahangana na hegitari30, ni ukuvuga hajya kungana na Leta ya Vatikani. Nyamara ikinyamakuru UMUSESO cyayoborwaga na Kabonero Charles cyerekanye ko habaye isaranganya ry'ukuri nta munyarwanda warenza hegitari zingana na n'ibice icyenda(0.9ha)! Nyuma y'iri saranganya , Mutsindashyaka Tewonesiti wayoboraga intara y'uburasirazuba yaje kuvuga ku mugaragaro ko Kagame Pawulo akimara kugenda bene amasambu bahise bayisubiza ku ngufu; nyuma yaho yaje guhita afungwa!

Si amasambu gusa yo mu Mutara aba batutsi b'indobanure zavuye Uganda bihaye, kuko bashyize no muri bimwe mu bice bya Kigali inyubako zihenze cyane mu mafaranga yavuye muri zahabu na diyama Agatsiko gasahura mu gihugu duturanye RDCongo.Aha twavuga nk'inzu Kigali City Tower ya Kabarebe na Kagame Pawulo n'undi muturirwa mushya witiriwe Makuza ariko nawo ukaba ari uwa Kagame( Makuza House). Abandi bafite iyindi mituriwa za Nyarutarama, Kicukiro, Gacuriro n'ahandi muri Kigali. Si Kigali gusa ariko kuko na Gitarama ihazamurwa nk'ibihumyo utibagiwe na Gisenyi ahari imiturirwa y'abatutsi bavuye muri RDCongo mu gace kiswe RDCongo nshya( Nouveau RDC) hafi ya ULK ishami ryo ku Gisenyi.
Umuturirwa wa Kagame Pawulo( Makuza House)

Nyuma yo kwigwizaho ibikingi, imiturirwa, Agatsiko kakomeje gahunda katangije ubwo muka Kagame Pawulo Janeti Nyiramongi na muka Kayumba Nyamwasa bashingaga ishuri ry'abana b'Inndobanure bise Girini Hili Akademi(  Green Hill Academy). Abana b'indobanure barangije aha bahita boherezwa kurangiriza mu mahanga muri za Kaminuza zikomeye zo muri Amerika, Canada, Ubwongereza, Ubudage, Uburusiya, Australia, Koreya y'Epfo n'ahandi.Kagame Pawulo we yohereza abe mu mahanga bakirangiza abanza! Umuhanga umwe mu bya Politike yemeza ko Uburezi ari intwaro ikomyeye yo gufata ubutegetsi no kubugumaho! Ni muri urwo rwego ubu abana b'indobanure bayobowe na mwene Yozefu Habineza ubu bariho bazenguruka kaminuza z'Amerika 52 mu mezi 2 biga uko bagomba gusimbura ababyeyi babo mu gupyinagaza ba Ngofero!

Nkuko byagenze ku ngoma ya Kinani nyuma y'imyaka icumi yo kwigwizaho imitungo, gutegura abana babo ngo bazabasimbure, bagasigara bikuza injyanishabitsina, niko bimeze n'ubu kwa Pawulo Kagame! Ni kenshi Shikama yagiye yandika inyandiko zamagana ubusambanyi bukorwa n'abategetsi b'Agatsiko. Ubu noneho bashyizeho n'urutonde rw'abakobwa biga muri kaminuza y'u Rwanda ishami rya Huye, izo ntonde zikaba zibikwa na bene amahoteli aba bategetsi baruhukiramo baje gusambanya aba bana ba Ngofero bahejwe mu byiza by'igihugu bakabigabira abana babo birirwa babyayamo mu mahanga abandi inda yarafatanye n'umugongo kubera inzara. Izindi ntonde Shikama yavuzeho cyane ni izitunzwe n'aba bakire usanga bafite amazu arinzwe cyane muri Kigali baza gusambanyirizamo abakobwa, ibi bikaba byaribonewe n'abanyamakuru ba kimwe mu binyamakuru by'Agatsiko wemeje ko aya mazu arinzwe cyane, akaba akorerwamo uburaya ariko akaba atariha imisoro! 
Umuturirwa wa Kagame na Kabarebe(Kigali City Tower)

Ubu busambanyi kandi bw'abategetsi buravugwa no mu muri za kaminuza zo mu Rwanda nk'ahahoze hitwa KIST aho abanyeshurikazi bahabwa amanota batakoreye ndetse bagahabwa n'amacumbi bamaze gutanga ruswa y'igitsina.Umuyobozi wa Rwanda Transparency akaba aherutse kwita aba barimu Abarozi aho kwitwa abarezi! Igiteye inkeke kurusha ibindi ubu ni uko ubushakashatsi bw'Agatsiko bwemeza ko ruswa ishingiye ku gitsina ubu ngo iri ku isonga mu mitangire y'akazi mu Rwanda. Ibyo twavuze rero ko aba bategetsi nyuma yo kwigwizaho imitungo n'ubukire bariho bikuza injyanishabitsina bikaba bifite ishingiro.
Ikimansuro Agatsiko kakuriye Abanyarwanda muri Uganda
Aba ni abanyeshurikazi bo mu mashuri yisumbuye barara mu tubyiniro i Kigali!
Aba nibo bazategaka byose ejo mu Rwanda babikesha igitsina.
photo : igihe.com
Ingaruka z'iri hame
 Kugirango bigufashe gusobanukirwa neza n'uburemere bw'iri hame, ibuka ko ubusambanyi buri mu ntwaro FPR-Inkotanyi yakoresheje mu gusenya ingoma ya Kinani ku buryo n'iyo Inkotanyi zidatera zigakomeza gukoresha iyi ntwaro gusa mu gihe cy'imyaka nka 40 uvuye muri 1983, zashoboraga gufata u Rwanda zitarwanye! Ku ngoma ya Pawulo Kagame si ko bizagenda nkuko umwe mu Banyagatsiko Tito Rutaremara aherutse kwivugira ko Abategetsi bo ku ngoma ya Kinani basambanyaga Abatutsikazi kuko ari beza ariko ngo bakabuza abandi banyarwanda kurongora abatutsikazi ngo nabo ibyo byiza bibagereho! Aha tuributsa Tito Rutaremara ko ubwiza bw'umuntu buba ku mutima. Ikindi ni uko uwo mbona ko ari mwiza, Gahima ashobora kuza akambwira ati uyu ni mubi umwiza ni uriya( La beauté est relative; les couleurs, les goûts et les femmes, on en discute pas). Bwiza bwa Mashira budashira irora n'irongorwa wari warihebewe n'ibikomangoma 2 by'ibihugu bitandukanye, Gahindiro w'u Rwanda na Rugayi rwa Buzi w'i Burundi yari umuhutukazi, sinzi niba aha mpemeranywa na Tito Rutaremara!

Iyi mvugo ya Tito Rutaremara rero iratwereka ko aba basambanywa na FPR aribo yakoresheje mu gusenya ingoma ya Kinani,  bityo uwihuse akaba yavuga ko iyi njyanishabitsina nta ngaruka izagira ku ngoma y'Agatsiko! Nyamara si uko bimeze kuko niba uku kwikuza injyanishabitsina bikomeje, bizagira ingaruka mbi mu minsi ya vuba ku ngoma ya Kagame ku buryo byaba mu bizayihirimisha.Rugikubita  hazabaho abantu benshi bazahabwa impamyabumenyi batazi gusoma! Aba nibo bazakomeza gutanga ruswa y'igitsina bakabona imyanya ikomeye mu buyobozi ku buryo Abana b'indobanure bashobora kuzarangiza ntibabone uko basimbura ba se ngo ubwiru bw'Agatsiko bukomeze. Ikizakurikiraho ni uko abashaka gufata ubutegetsi baca kuri izi nzobere z'igitsina bakagera ku bwiru bagakubita Kagame inkoni mu kico ingoma ye igahenuka ityo.

Uwahoze ari umusirikare ( intwaramiheto ) mu ngabo z'i Burundi yamagana manda ya gatatu ya Nkurunziza Petero mu kwezi kwa Werurwe 2015 kuri Radiyo yacu( Voice of America (VOA) )yasobanuye  impamvu ingoma y'Abatutsi b'i Burundi bitari byoroshye kuyihirika kandi ngo nta gitugu cyayiranze nkuko we abyivugira: " Umuperezida wese wamara imyaka icumi ku butegetsi, twaramukorera kudeta, tugaca tumukombora" Ese aho siko byari bikwiye kumera mu Rwanda kugirango twubake igihugu kigendera ku iterambere rihamye, ridaheza, kandi rirambye aho kwirirwa twikoreye inkangara zuzuyyemo ikinyoma ngo turasabira umunyagitugu uhagarariye abamunzwe n'umurengwe ngo azadutegeke ubuziraherezo? Ubyumva ukundi azansubize.
(reba andi mafoto y'ibihe bya nyuma hasi aha)
Dg NKUSI Yozefu
www.shikamaye.blogspot.no
Shikama Uharanire ko Ukuri gusimbura ikinyoma.
__________________________________________________________
Andi mafoto yerekana ko Satani w'ubunywamaraso yasimbuwe n'uwinjyanishabitsina mu Rwanda


Kigali

Kigali
Kigali

8 comments:

  1. Tanga igitekerezo cyawe kuri iyi nyandiko
    Urakoze.

    ReplyDelete
  2. Mwongeye kwirirwa amahoro abasomyi ba shikama? Kuri ibi bimenyetso twagereranya n'amahame aranga ingoma zihirima cg se ihirima ry'ingoma z'iwacu, harimo ibintu bibiri navugako ari umutego ukomeye utegwa rubanda rugufi rwamara kuwugwamo ejo hazaza hakaba hararangiye kubakiri bato naho abana bagatsiko bakataje mu bumenyi no kwigwizaho umutungo.Ndahamya nezako ubirenganzira bwo gutanga impushya ku tubari tubyina izo mbyino mva kuzimu ni ukuboreza abantu bakumvako igihugu kiryoshye kiyobowe neza na twatundi baba babiriye ibyuya bakatuzana kwishimisha muri izo ndaya na byeri zihenze igikurikira ni ubushomeri indwara n'urupfu ahasigaye uwabahaye ubwo burenganzira akaba aratambutse abandi bishwe n'isindwe, ikindi Aba bakobwa iyo bataye ishuli bagahonja ibiyobyabwenge bakabyara abandi bakandura SIDA biba birangiye ibyo kwiga no kubona aho igihugu gitemba kigana ntumubwire ahasigaye basigare bacungiye kuri rwa rutonde rwa babandi batishoboye yarangiza ati dufite abayobozi beza badushyira ku ntonde z'abatindi nyakujya aho gushyirwa ku rutonde rw'abishyurirwa buruse zo mu mahanga. Nkaba nakwanzura mvuga nti ubutegetsi bwose buciye mu cyanzu bukoresha aya mayeri yo gutanga umudendezo no kurangaza rubanda kugirango rukuremo icyacumi rubone uko ruhuma rubanda amaso kugirango ntirubone amanyanga ari gukorwa n'abakegesi.

    ReplyDelete
    Replies
    1. @Makoki Mugisha,
      ibyo uvuga ni ukuri gusa!Niba uri i Kigali, uzanyarukire muri turiya tubyiniro uzambwire ko hari umwana wa Kagame Pawulo usangamo! Uzambwire ko hari uwa Makuza usangamo! Uzambwire ko hari umwana wa wamugore ukuriye Inkomamashyi usangayo!, n'abandi n'abandi.

      Ndakumenyesha ko nta mwana w'Agatsiko n'umwe wiga muri kaminuza zo mu Rwanda ubuzabaye uruhuri! None se wazababona gute muri turiya tubyiniro cyangwa muri Primus Guma Guma?!

      Kiriya kimansuro na Primus Guma Guma ni ubwoko bw'ikinya ( Anesthesia) baha urubyiruko ngo rutumva ububabare batewe na FPR.

      Delete
  3. Arega twajwemo. Ibi byose ni ibyo kurangaza abantu babakontorora Psychologiquement.

    Uwatwawe no kureba ibi bimansuro ifaranga rye niho rishirira ufite ako Kabari nawe akagenera ICYAMA cyangwa bakamufungira. (Reba ibyabaye ku Akabyiniro ka Kadilake).

    Aha kandi iyo hakuruye abagabo n'abasore baba mu migi FRW 5000 bagombye kuba boherereza bene wabo mu icyaro arahatikirira.

    Mu cyaro insina barategekwa kuzirandura ngo batabona urwangwa bakoresha ibirori ubundi mu mugi bakongera ibimansuru ku amayoga.

    Rupiyefu tuzayikizwa no kutitabira gahunda zayo. Dore abakandamijwe ntibakwiye kwitabira izi gahunda z'ibimansuro pe.

    ReplyDelete
    Replies
    1. Ubu inzara iravuza ubuhuha mu gihugu hose kubera ko Agatsiko kabujije abaturage guhinga ibihingwa ngandurarugo. Ibijumba ngo ni umwanda, ibishyimbo bikaba uko, amasaka yo sinakubwira. Urutoke ubu rwose baratemaguye. Aba bavantara bifata nk'abantu bavukiye mu Kiyovu twitaga icy'abakire wagirango ntibabaye mu nkambi ya Nakivale muri Uganda batunzwe n'impungure kimwe n'izindi mpunzi zose! Aba nibo mu Kinyarwanda bita INKIRABUHERI!

      Iki kimansuro kimwe n'iriya nzara ni ibintu byateguriwe muri Uganda mbere y'uko aka Gatsiko gatera u Rwanda kuri ya tariki y'umuvumo ya 1/10/1990.

      Delete
  4. To Dr Nkusi. Allow me to ask you a question here although my question does not relate to the article that much.

    Question: Ubona ute ukuntu abantu bahuriza hamwe ubuhanga bafite maze abagize amahirwe yo kwiga bakaba bafungura umurongo wo kwigishirizaho bene ngofero birirwa bapfunyikirwa amazi mu mashuri mu Rwanda?

    Dore n'ikinyarwanda kizima Rupiyefu ishaka kugihinduramo urufefeko none nikitigishwa ko Rupiyefu izasiga yaracyangije mu Gihugu Kandi n'abari hanze bakaba batakiga?

    Rupiyefu dore itumiza urubyiruko ikarwigisha ibyo ishaka mu Ingando. Abatayemera nabo bakwiye kwigisha urubyiruko.

    Ese abana baba mu Inkambi twabafasha dute ku imfashanyigisho?
    Dore abajyeshi batazi gusoma aho batugejeje. Dukwiye kunyuranya nabo maze urubyiruko rukiga.

    ReplyDelete
    Replies
    1. @anonymous,
      Iki kibazo cyawe gifite ishingiro. Ni ngombwa ko buri wese ukunda u Rwanda agitekerezaho ku uryo bwimbitse tugasenyera ku mugozi umwe twishakamo ibisubizo. Ndizera ko utazahwema kukigarura kenshi muri komanteri kugeza habonetse ukuntu, nanjye kandi nzakomeza kugitekerezaho cyane. Imana ikurinde.

      Delete
  5. Uyu muntu wo muri Malyasia agomba kubanza kwiga ikinyarwanda akabanza gusoma inyandiko mbere yo kwamamaza kuri SHIKAMA!

    ReplyDelete

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355