GUHERA MU 2010 ABATURARWANDA BAMAZE IMYAKA 4 BAFITE ICYOBA N'IGIHUNGA BATERWA NO KUBONA ABASIRIKARI BURI MUGOROBA KU MUHANDA BAFITE IMBUNDA NYAMARA ZITAGIRA AMASASU HAGAMIJWE KUBURIZAMO IHIRIKWA RYA RWABUJINDIRI PEREZIDA KAGAME.

Guhera mu 2010, abanyarwanda baba imbere mu Rwanda ntibasiba kubona abasirikari bahagaze ku mihanda no mu nsisiro guhera i saa cyenda zo ku gicamunsi kugera mu rucyerera. Abaturage babona izo ngabo za Kagame bo bakunze gucyeka ko intego ari ukubacungira umutekano nyamara sibyo nk'uko SHIKAMA twabikurikiranye tukaba tugiye kubibavira imuzi muri iyi nkuru.

BIJYA GUTANGIRA: 

Kuva KAYUMBA NYAMWASA na PATRICK KAREGEYA bahunga, Kagame yatangiye kwirabaraba kudeta niko gukaza maneko hagati mu gisirikari. Kubera ko byageze aho bikamurenga yahisemo gutanga itegeko ry'uko guhera saa cyenda zo ku gicamunsi buri musirikari agomba kuva mu kigo akajya ku muhanda aho abaturage bamubona neza.Ibi bikaba byarabaye itegeko kugira ngo mu gihe cya nimugoroba abasirikare batatane kandi buri umwe aneke mugenzi we bityo gushyira hamwe ibitekerezo byo kumukorera kudeta binanirane cyangwa se bikomeze kuba ingorabahizi.

IMBUNDA KU MIHANDA ZITARIMO AMASASU:

SHIKAMA ntitujya dupfa kwandikira abanyarwanda amanjwe. Iyo inkuru tutarayicukumbura tuba turetse tukabanza tukabona amakuru yose. Umunsi umwe naganiriye n'umusirikari twiganye muri Kaminuza ubu akaba afite ipeti rya Major.Namubajije impamvu bahagarara ku muhanda aransubiza ati:

"Buriya tuba duhagaze ku muhanda kugira ngo tutica Kagame tumukoreye KUDETA bityo ibitekerezo byacu bigatatana kandi buriya ziriya mbunda za SMG tuba dufite nta sasu na rimwe riba ryibereyemo kugira ngo tutarasa n'abaturage kubera kubihirwa".

GUHAGARARA KU MUHANDA NTA KUROBANURA AMAPETI:

 Mu mategeko agena akanagenga igisirikari cy'umwuga, mu gihe cy'amahoro imbunda ifatwa cyangwa itwarwa n'umusirikari muto kurusha abandi ariwe SORUDA. Kuri Kagame siko biri kuko aho ku muhanda usanga na koloneli ahetse imbunda ku rutugu imvura imuri ku  mugongo. Iyi myitwarire itari iya gisirikari tukaba tutanayita iya kinyeshyamba kuko nta bunyamwuga bugaragaramo. Ibi bikorwa n'iyi myitwarire Kagame yategetse bikaba bijyana n'iterabwoba rikorerwa abaturage aho nta muntu wemererwa kuganira n'undi bahuriye ku muhanda n'iyo baba ari inshuti zidaherukana kandi zikumburanye.

KUBANGAMIRA UBWISANZURE BWA RUBANDA: 

Nayobewe abazungu baha ibikombe Kagame aho bakura amakuru. Abanyarwanda basanzwe barimwe ubwisanzure bwo kuvuga icyo utekereza nyamara haba ku ngoma ya cyami, ya Kayibanda ndetse n'iya Habyarimana, nta muturage wigeze abuzwa kuvugana na mugenzi we. Iki gikorwa kigayitse cyo kubuza abaturage gusabana uwo mu majoro yambwiye ko ngo ari ibwirizwa bahawe na Kagame ngo kuko ingabo za Kayumba na KIGELI na FDLR zijagata mu baturage kandi badashobora kubasha kubavangura bityo ngo bahitamo kubuza amahwemo rubanda.

"Umujinya mwiza si umuranduranzuzi ahubwo ni udufasha kwigira. Erega n'ubundi ngo umugabo arigira, yakwibura agapfa"Kizito Mihigo

MANEKO MURI BURI RUGO KUGERA NO KU BURIRI: 

Shikama tukibabwira iby'iyi nkuru ibangamiye umutekano n'ituze bya rubanda ku bw'inyungu z'umuntu umwe rukumbi ariwe Kagame, tubamenyeshe ko buri munyarwanda aho ari hose aba afite maneko we yamubura akineka.  Mu ndagu za MAGAYANE hari aho yemeje ko ku ngoma ya RWABUJINDIRI RURYA NTIRIHAGE ariwe Paul KAGAME ngo hazabaho urwicyekwe mu bantu kugeza n'aho umugabo azishisha umugore we, umugore nawe akishisha umugabo we bityo n'abana bakaneka ababyeyi babo kandi bakabatanga.

Ibi rero nta wabihakana kuko aribyo birimo kuba ku banyarwanda bose nta n'umwe uvuyemo baba abari mu gihugu imbere kimwe n'impunzi. Ibi bikaba byemezwa n'abasirikari bagera n'aho bavuga ko ku ngoma ya Kagame burya ngo n'iyo abantu baryamanye ku buriri bumwe, umwe aba ari maneko w'undi kandi akamufata nk'umwanzi. 

ITEGURWA RY'UMUGAMBI MUBISHA WO KURIMBURA ABANYARWANDA BATAROBANUYE: 

Muri kuriya guhagarara ku mihanda n'imbunda SHIKAMA yemeza ko nta n'isasu na rimwe riba ryibereyemo kuko twabisobanuriwe n'abasirikari bizewe, nta wabura kuvuga ko harimo n'ubutumwa bwo kwitegura kuzarimbura abatuye u Rwanda. Ibi bikaba bishoboka cyane kandi biri mu mugambi mubisha wa Kagame kuko ku muhanda baba banareba ibyo abaturage bigira byose bakaboneraho kumenya n'iyo bataha. 

Umenya imitsindo FPR yavanye Uganda yari muri iyi ntama yarajyanye nayo imaze kubagwa

Ikindi ni uko byongerera izi ngabo kubihirwa aho kwishimira umurimo bakora kuko kuraza KOLONELI ku muhanda aribwa n'imibu imurira hamwe n'abashinzwe kumurinda, kumwubaha no kumwumvira nabyo bishobora guca ibice mu gisirikari. Aha niho mpera mu isesengura ryanjye bwite nemeza ko umunsi Kagame bazamuhirika kuko atazatura nk'umusozi, ba basirikari bashobora kuzirara mu baturage bakarimbagura mu rwego rwo kwihora uwabaraje rubunda barinze umuyaga.

Mu gusoza iyi nkuru, SHIKAMA turagira ngo tubwize abanyarwanda ukuri tubabwire ko ziriya ngabo babona ku muhanda zidashinzwe kubacungira umutekano ahubwo zigamije kubabuza amahoro kugira ngo iminsi ya Kagame ku butegetsi yicume kuko ibimenyetso by'ihirima ry'ingoma ye byose byageze ku iherezo hakaba hasigaye imbarutso gusa bityo abanyarwanda twese ntawe usigaye inyuma nk'ikoti tugahabwa uburenganzira bwose mu gihugu cyacu.

Banyarwanda tubiharanire kuko SHIKAMA imaze kubahishurira ko ntawe uzabakoma imbere umunsi mwagiye mu mihanda ntawe muhutaza kuko imbunda zirimo ubusa ari iterabwoba gusa ngo agatsiko kamare kabiri.

urashaka kubeshyuza iyi nyandiko cyangwa kuyunganira?Kanda aha.

BAZIGUKETA F.

shikamaye.blogspot.com

shikama ku kuri na Demukarasi (SKUD)